Con motivo da Semana do Libro, no Colexio San Fermín estamos a vivir uns días cheos de actividades arredor da lectura e da creatividade.
Hoxe foi a quenda do alumnado do primeiro ciclo de Primaria, que visitou a Escola Infantil San Nicolás para compartir unha xornada moi especial cos máis pequenos. Durante o encontro, gozaron xuntos do conto O monstro de cores, unha historia que lles permitiu traballar as emocións dun xeito próximo e significativo.
Tras a lectura, os alumnos e alumnas de Primaria colaboraron cos nenos e nenas da escola infantil na elaboración dunha coroa inspirada no conto, favorecendo a cooperación, a creatividade e o intercambio entre etapas.
Foi unha experiencia moi divertida e enriquecedora para todos, na que a lectura se converteu nun punto de encontro para aprender, compartir e desfrutar xuntos.
